政情：火爆80後決心從政
好多政黨近年都吸納唔少後生仔，好似代表白鴿黨參選嚟緊區議會選舉嘅區諾軒及許智峯，都係廿幾歲仔，同樣做過學運領袖。中大畢業嘅區諾軒仲曾經喺校內演講活動鬧爆當時仲係政務司司長嘅唐英年，認真火爆。
依家喺中大做助教嘅區諾軒，原來同民主小女神周澄係同屆，當年一齊搞學生會，曾經為反對校巴收費，發動同學自製代用券塞爆校巴收銀箱，仲當面鬧爆到校內演講嘅唐英年，○九年加入白鴿黨，話要代群眾發聲做區議員，嚟緊就會出選南區區議會利東一選區，與人民力量陳封華及張少強對壘。
同樣讀大學時參與學生會嘅許智峯亦都會出選中西區區議會中環選區，佢話喺加拿大留學時已經不滿港府施政，畢業後索性入黨做政策研究。雖然區選面對女律師衛珮璇及選民力量蘇浩兩個對手，但智峯話冇有怕，仲計劃夾Band造勢拉票添。