政情：林D9升旗禮扮大佬

林瑞麟紮職做咗政務司司長，激怒好多市民。尋日有讀者睇到林D9喺十‧一升旗禮上，冇做敬禮手勢，喪鬧林D9大不敬，專登打電話畀我哋投訴。翻看相片，林D9站姿確係別樹一格，其他企喺最前排嘅嘉賓睇升旗嘅時候，雙手都伸直垂喺兩腿旁邊，唯獨係佢好似大老闆咁，將雙手懶懶閒咁放喺身後。不過我哋問過熟悉升旗儀式嘅人，佢話觀看升旗禮冇規定要將雙手垂直，林D9雙手放後無可無不可，只要佢企得正、無藐嘴藐舌或者雙手翹喺胸前就OK。再者林D9唔係制服團隊成員，唔需要敬禮。雖然林D9嘅站姿冇問題，不過呢件事反映市民對佢有幾深惡痛絕。