政情：莊偉茵膺影響力百強
國泰航空企業事務董事莊偉茵（Quince）係公關界名人，平日間公司有咩問題，佢都會快速回應，即使面對最令國泰管理層頭痛嘅工潮，佢都一樣游刃有餘，為公司拆咗唔少彈。Quince最近就獲選為「全球影響一百強（Influence100）」風雲人物，更係唯一嘅港人及華人當選添。
呢個「全球影響一百強」選舉係由國際著名公關行業分析機構《霍姆斯報告》（Holmes Report）主辦，評選標準主要係考核吓入選嘅公關專業人員喺公司同業界有幾大影響力、對公司嘅財政預算管理有幾獨到、宣傳夠唔夠創意等，所以獲選者嘅分量舉足輕重。
Quince九八年加入國泰，往後拾級而上，最先係做企業傳訊經理，然後升任機艙服務總經理，之後再升做航空服務董事，到○八年就升任為企業事務董事添。淨係睇履歷，就知Quince能夠入選百強，確係實至名歸。