政情：唐唐鬼祟落區條條Fing
疑似特首候選人唐英年日前終於捨得辭職，佢發表書面聲明時話會開始同各界人士及市民接觸、討論同溝通，但唔好期望過高，因為大家睇到嘅未必係真嘅一面。有傳唐唐嘅選舉機器已全力開動，仲搵埋公關公司籌備宣傳活動，但據聞好多活動都唔會安排傳媒採訪，一切都靜雞雞做完後，好似國務院副總理李克強訪港安排咁，選擇性發放新聞稿、相片及影片敷衍傳媒。
由於唐唐多次開口嗑着脷失言，相信好多人都想睇佢落區親民條條Fing個樣，但如果佢落區都玩神秘閉門造車，咁就真係悲哀。有傳佢咁做無非係怕畀反對者狙擊，尤其係依家啲示威者傾向用比較激烈嘅手法示威，對唐唐呢類富二代嚟講，逃避可能真係最好嘅辦法。大家都知，唐唐出醜時經常滿面通紅，嚴重者立即變黑亦得，所以秘密行動可避免當眾出醜。
網民踢爆秘密訪校
唐唐玩鬼祟，但尋日就有網民喺討論區上爆料，話唐唐遲吓會去佢學校探訪，佢初步計劃質詢小圈子選舉嘅問題，仲叫網友教路，睇吓到時點樣當面質詢唐唐咁話。呢個留言一出，大班網民踴躍發表意見，紛紛出謀獻策，例如有人質疑，一個只識飲紅酒同條條Fing嘅人點可以做特首、又有人叫佢就六四事件表態、以及對於受到神嘅感召有乜睇法，總之就五花八門，極之尖銳。
唔知唐唐睇到咁多難答嘅問題，會唔會驚到騰晒雞呢？甚至臨時臨急取消呢個探訪活動呢？其實落區做騷無論係真心定假意，基本上都係選舉嘅指定動作，如果唐唐真係秘密落區收埋嚟做，相信會令市民好失望囉，睇怕亦會惹來傳媒嘅不滿。當然啦，呢啲只係傳聞，唐唐如果係醒目嘅話，最好三思而後行，否則民望愈插愈低，就算做到特首都難以服眾。