中環出更：小吉跑步籌款 撐健康快車
「健康快車」將於十月底會同清水灣鄉村俱樂部合辦跑步籌款活動，「健康快車」創會主席兼籌委會主席方黃吉雯（小吉）自然力撐，日前着住佢至愛嘅Leonard套裝裙出席記招推介活動。佢件深藍色外套上面印有鮮艷嘅彩色橫間，高貴得嚟又夠搶鏡，唔知係咪特登着嚟襯番火車醫院車身上面嘅彩虹呢？
卓妮問小吉期望今次會籌到幾多善款，佢預料會有幾十萬元，但當然係愈多愈好啦，因為可以幫到多啲內地嘅白內障患者重見光明。小吉又話，咁有意義嘅活動，佢到時一定會落場跑，同大家一齊感受清水灣沿路嘅美景喎。
王桂壎搞嘉年華助興
清水灣鄉村俱樂部副主席王桂壎就話，今屆慈善跑係首次喺活動後安排攤位遊戲同嘉年華，事緣去年有唔少參加者跑完之後同佢講，咁快就解散，浪費咗個靚景，佢於是同小吉商量過之後，決定物盡其用搞埋嘉年華，如果反應好嘅話，會一直搞落去喎。