問：記者 唐：唐英年
問︰一直有傳聞包括詹培忠話過你有婚外情，嗰個人是否袁莎妮？
唐︰我都有聽過好多呢啲傳聞，但我依家唔想評論呢啲傳聞住，因為我知道有時好多傳聞傳來傳去傳咗好耐，我都聽過好多不同嘅版本，有唔少都相當具……點講呢，都有一啲娛樂性。
問︰會否擔心有黑材料畀人爆出嚟，還是一啲都冇？
唐︰呢啲我都聽咗好耐，正如我所講，我諗社會上一定會有好多不同傳聞，無論係政治、或者經濟、或者緋聞呢一類，我相信傳聞有好多，如果係我屋企人自己屋企事，我當然會處理，至於其他嗰啲我都唔會評論。
問︰會否澄清之前嘅不利傳聞？
唐︰我諗好難所有傳聞都澄清晒，因為有啲傳聞可能我都未聽到，再加上傳聞好多五花八門樣樣都有，可能呢啲係選舉政治，係實會有，但我都睇見好多傳媒都唔係話真係好高調咁樣，將啲完全冇任何根據嘅嘢去將佢放大，我相信傳媒一定有佢嘅守則。
問︰對手多唔多你嘅黑材料？你會如何應對？
唐︰我唔會拎呢啲嘢嚟做揣測。
問︰袁莎妮入總商會係咪為你特首選舉鋪路？
唐︰袁莎妮入總商會同我係完全冇關，佢自己亦都親口講過，你依家都可以聽我再講多一次，佢係一個好能幹嘅人，我對佢入到總商會做總幹事，表示鼓勵同高興，總商會有咁嘅眼光揀到一位咁能幹嘅人士，我覺得對總商會嘅發展一定有幫助。