港府染上家訪癮 收集民意變擾民

統計處前排搞人口普查,鬧出普查員被狗隻追咬嘅新聞,都唔知幾狼狽。所以咯喎,如果屋企養狗,未來幾個月就要小心睇實啲嘞,唔係嘅話,萬一誤傷公務人員,狗主隨時孭上法律責任,咁就無辜啦。

大家可能覺得奇怪,人口普查唔係結束咗嘞咩?係就係,之不過港府有鋪上門家訪嘅癮,嗰頭人口普查結束,呢頭又有其他部門上門喇。嗱,新訪客就係廉政公署。當局話喎,廉署將於十月三日起進行約兩個月嘅民意調查,以隨機抽樣方式選出一千五百名市民,以家訪形式收集對肅貪工作嘅意見。

點解話港府有鋪家訪癮呢?等功夫茶同大家數數手指啦,七月份統計處做完人口普查,八月份就到水務署進行用水習慣研究,跟住輪到運輸署做交通習慣調查,依家又到廉署做不速之客,唔通公務員真係咁得閒?即係咁,如果有真正需要,港府做調查研究了解民意,冇人會反對,但應該適可而止㗎,次次派人家訪,下下騷擾民居,你唔煩,市民煩吖嘛!

仲有吖,頻頻家訪,都好浪費公帑啫。好似運輸署咁,委託承辦商聘請調查員,以「行孖咇」方式走訪五萬個住戶,收集乘搭交通工具嘅意見,呢筆數已經好襟計啦。喂,一字咁淺嘅問題,以電郵或書面形式提問就得喇,何須多此一舉派人上門做抄寫員呀?

嗱嗱嗱,如果抽調公務員代勞就更加大花筒添,大家知啦,尊貴公僕嘅薪酬高過市場一截,不務正業走去做調查員喎,仲唔係浪費公帑!計功夫茶話齋,如果官僚一個二個真係咁清閒,唔該勤力啲做好本分仲實際喇。

講開擾民,政府部門排住隊上門,真係煩不勝煩。其實,人口普查就話有實際需要啫,其他可免則免喇,好多市民為口奔馳,冇幾多人學似公務員咁悠閒喺屋企等家訪嘅咋!

再講喇,港府做家訪,市民嘅意見最後係咪得到重視,真係天曉得。呢,曾蔭權民望跌到趴街,市民要求佢落台嘅聲音一浪高過一浪,昭昭民意咪一直被人當作浮雲?仲有,港府成日做假諮詢,玩弄民意,忽悠民情,點知家訪民調係咪做騷㗎?

一句講晒,港府染上家訪癮,都要顧及市民感受,如果真係咁重視民意,第一個家訪題目應該就係「港府應否毫無節制地進行家訪調查」。相信好多住戶會毫不客氣咁答你:納稅人嘅血汗錢搵得好辛苦㗎,唔該港府咪亂咁花!