政情：星屑醫生 泰北探訪新體驗
區議會選舉已經揭開戰幔，各候選人都周身唔得閒，今年首度披甲出選黃埔東選區嘅選民力量「星屑醫生」歐陽英傑亦唔例外，近日積極落區宣傳。唔講唔知，百足咁多爪嘅醫生，早排原來去咗探訪一間位於泰國北部森林嘅戒毒學校，一去就成個禮拜咁長，仲搞到病咗返港添。
星屑醫生話，間學校香港人有份營運，形式同香港嘅正生書院差唔多，佢帶領幾個香港年輕人，同當地學生生活咗一星期，期間完全同外界斷絕通訊，又要忍受比較落後嘅衞生設備。不過，大家唔介意之餘，亦有好深感受，全因見到一班青年肯改過自新，覺得好感動。
星屑醫生此行亦去當地一間小學教英文，佢發現當地小朋友生活條件雖然不及香港，但個個面上都掛住天真無邪嘅笑容，幸福原來可以咁簡單。探小朋友當然開心啦，但嚟緊區選場仗都唔易打，除咗佢之外，同區參選嘅仲有梁美芬同民主黨黃碧雲。