政情：盧振雄退休騷 終於落幕
為咗歡送消防處處長盧振雄而舉行嘅連串「退休騷」，連日來備受批評，畀人質疑浪費公帑，公器私用，連盧Sir都自稱被呢次歡送活動「玩殘」，真係辛苦晒。不過，連串退休騷隨着尋日沙田消防局舉行結業典禮而結束，經歷三十六年消防生涯嘅盧Sir，終於退休了！
尋日結業典禮又一傑作，由於參加者眾多，有消防車被迫泊出街外，多名高級消防官員嘅座駕亦擠滿消防局外通道，要勞師動眾兼由交通警員維持秩序，結業禮歷時約兩小時。雖然今次安排極為擾民，但消防處發言人話，咁樣唔影響救援，亦唔涉阻街，因消防局外並唔係禁區喎。
尋日最後一日返工嘅盧Sir未有回應記者提問，只係離開時絞低車窗同大家講再見。