東昌街單車店霸地擺貨
大埔為本地單車遊熱點之一，單車店佔用公共空間問題亦愈見猖獗。石先生指出，東昌街一帶行人路被單車店佔用擺放貨物問題非常嚴重，「啲舖頭直頭霸晒成條路，仲開埋簷篷吊起啲單車，當正係自己地方！」石雖然曾多次向政府部門投訴，但皆未見改善，「明知有人霸官地，政府都可以唔理，你話係咪好諷刺？」
地政署巡查後 情況依然
地政總署發言人表示，接獲投訴後即時派員到實地考察，發現涉事地點擺放單車，並承認早已獲悉問題，已聯絡相關部門密切監察情況，有需要時會採取聯合行動清理。
不過，記者事後曾多次途經上址，發現單車及雜物佔用行人路情況依然。
「呢排仲愈擺愈多，邊度有清過？政府連咁少嘅嘢都搞唔掂，根本就縱容！」石先生直指單車店佔用行人路擺放貨物不但未有改善，且更「愈霸愈多」，不滿地政總署虛應市民，「成日話會留意，根本得個講字，再係咁個個都霸個地方擺嘢啦！」