政情：胡紅玉院士袍遮腳傷
行政會議成員胡紅玉（Anna）上星期去新政府總部開會，見佢行路要用拐杖，舉步維艱，尋日至有機會問候佢，原來佢喺莫斯科嘅紅場受傷，而且傷勢都幾嚴重添。
話說Anna早前陪同夫婿去莫斯科，出席俄國總統梅德韋傑夫主持嘅一個論壇。佢去到莫斯科名勝紅場遊覽，正欲趨前細賞一尊將軍銅像，冷不防地面濕滑，跣倒受傷。Anna話起初以為只係一般拗柴，經由一名英俊士兵扶起之後，並無向當地醫生求診，以為無事，直至返港就醫，經診斷至發現非同小可，原來佢左腳扭傷之餘，右腿膝蓋亦告爆裂，故此要休養個幾月咁話。
港大為表揚Anna對法律界嘅貢獻，向佢頒發院士銜，佢尋日出席儀式，為免見到腿上支架，以院士袍配長褲，咁就靚晒嘞，當然仲有老公攙扶，兩人有影皆雙，風雨同路，咁就乜事都冇有怕喇。