政情：唐唐英文渣過小學生?!
疑似特首候選人唐英年（唐唐）終於喺前日請辭政務司司長，佢即時向高級公務員發出電郵作出話別，但有人喺網上睇到有份疑似唐唐嘅話別電郵，發現唐唐疑似老貓燒鬚犯上小學生嘅錯誤，將加入政府嘅英文過去式joined誤寫為joint，如果唐唐未正式「備選」已經犯埋呢啲低級錯誤，難保日後會再出現乜致命錯誤，唐營中人第時睇怕有得震無得瞓喇。
唐唐辭職嘅傳聞傳咗大半個月，突然喺前日正式請辭，特別向高級公務員發出話別電郵，主要內容同佢向傳媒講自己辭職原因嘅英文發言大同小異，多咗嘅部分係稱讚一直同佢合作嘅公務員作出唔少貢獻，總之擦一輪鞋，留個好印象。
亂加「t」當過去式
咁簡單嘅一封信，竟然都有錯。有人睇完網上流傳疑似唐唐嘅話別電郵後，發現唐唐將「自從我○二年加入政府……」嘅英文，寫成為Ever since I joint the Government in 2002……。
我哋就此問過英文科老師陳明姬，佢話唐唐寫呢句句子明顯用錯字，因為無論喺意思上定文法上，都應該用joined（加入）而唔係joint（連結），因為ever since之後，應該用過去式past tense，佢估計唐唐可能混淆咗，以為個個英文生字都可以加個「t」就變成過去式，亦有可能唐唐平時讀英文多過寫英文，一時手快就將兩個讀音好接近嘅字搞錯咗喎。
話時話，如果呢份電郵係假嘅，畀人屈嘅唐唐就一天都光晒，但倘若係真嘅，唐唐同唐營中人未正式出師就再次撞板，就肯定會畀人笑到面都黃。
老實講，唐唐都唔係首次在英文書信來往中出錯，前一兩年有封寫畀立法會主席嘅投訴信，就畀新民黨主席葉劉淑儀發現佢嘅英文水平好有問題。
唐唐最近一次開口着脷，講緊嘅係副總理李克強訪港嘅保安安排，佢就衝口而出話completely rubbish，佢說話嘅內容惹人反感，用字亦被批評係錯嘅。