中環出更：楊素珊畫展 名人北上撐場
北京藝術氣息熱爆，唔少創作人北上定居，貪嗰度人傑地靈，藝術靈感特別多。專業及資深行政人員協會才女楊素珊（Susan）拉隊上京，周一喺北京今日美術館舉行《生息》藝術展，城中名人坐飛機北上睇畫，認真畀面。
藝展組合大師雲集，著名作曲家金培達、作詞人陳少琪，及珠寶設計師翁狄森齊以多媒體方式，宣揚環保。咁有創意，嚟睇展覽嘅北京市民都話佩服。專資會會長胡曉明讚作品有啟發性，佢同廠商會副會長施榮懷買機票撐老友，名副其實為藝術「犧牲」。
火鍋慶功 屙足幾日
近百好友風塵僕僕而來，Susan開心到眼濕濕，拉大隊食麻辣火鍋慶祝，點知腸胃頂唔順，屙足幾日未止瀉，條腰當堂瘦晒。朋友唔知，以為佢搞畫展太辛苦，戥佢慘，令佢啼笑皆非。