政情：沈運華從政唔做律師
律師係唔少人夢寐以求嘅職業，但喺城市大學法律系畢業嘅民主黨沈運華並冇投身法律界，反而選擇地區工作，話要用專業知識幫班基層打工仔出頭。不過，佢屋企人唔係太支持，仲話如果做一排冇成績就要佢乖乖哋去律師樓打工，但阿沈就話為公義點都要撐到底喎。
廿七歲嘅阿沈讀書成績優異，港大政治系畢業後又去城大讀法律，佢話自己原本都係「政治冷感」，但港大畢業後機緣巧合去咗做區議員助理，見到議員日做夜做幫街坊後，先改變政治係污糟邋遢嘅諗法，決定要為街坊做啲嘢。不過，做地區工作時發覺自己唔夠班，所以半工讀修讀法律，可以幫街坊解決法律問題咁話。
阿沈已經任彩雲邨社區主任四年，尤其關注勞工權益，磨刀四年，已報名參選黃大仙區議會彩雲南選區，與民建聯參選人張思晉對壘。阿沈除咗讀書叻外，興趣仲多籮籮，觀星、行山樣樣掂，佢話行山、睇星可以磨練意志，畀自己有個思考嘅空間喎。