中環出更：查太冇趁低吸股怕申報
特首選戰將進入埋身肉搏階段，兩位疑似特首候選人相繼宣布辭職。卓妮前日中午行過中環香港會所時，巧遇行政會議成員查史美倫（Laura），講開佢同事行會召集人梁振英（CY），Laura就形容CY好似佢哋嘅班長，做行會發言人兼做聯絡成員，仲大讚呢個班長做得好好添。
張建東指歐債有排搞
對於兩位疑似特首候選人邊個好啲，Laura話同佢哋兩個都好熟，兩個都做得好，所以不作評論，但估計邊個會跑出呢？佢就話唔識睇喎，答得相當穩陣。港股跌穿萬七點，Laura話冇趁低吸納，因為唔識睇，二來又要向行會申報，咁麻煩，寧願唔買喇。
卓妮之後又遇到另一個行會成員張建東，問佢有冇買股票，佢暗示自己「零股票」，唔識玩，真係謙虛，但佢預測股市前景好唔明朗，歐債有排搞喎。
卓妮