政情：政壇「新丁」做溫和80後
今屆區選出現唔少新面孔，好似80後嘅陽光勵進會社長丁志威（Roy）以無黨派人士參選黃大仙竹園北選區，對戰社民連主席陶君行以及同為無政黨背景嘅陳嘉偉。
家族做塑膠生意嘅Roy話，自己初初決定參選時，家人都有啲擔心，不過三十而立嘅佢自細受爺爺教誨，話年輕人要有所作為，覺得應該衝破家族嘅枷鎖出去為社會做啲事。好多人都話80後偏激，佢自己反而想以溫和嘅態度服務社會。
因為Roy姓丁，又好鍾意食出前一丁，街坊幫佢起咗個名叫做「新丁」。佢話自己雖然非本區住，但由於爺爺間公司喺新蒲崗，自己經常都去黃大仙，頗了解本區嘅情況。佢同老友○六年傑青呂宇俊一齊創立咗陽光勵進會之後，決心服務社區呢團火就燒得更加猛烈。