回歸前嘅立法局票后黃錢其濂嘅英文好係人都知，早年離開政圈並移居澳洲，當時好多政界中人都話如果原本都係ＡＯ嘅黃太肯教依家啲ＡＯ一招半式，相信佢哋都會受益不淺。據聞黃太最近受到某補習社邀請，鐵定出山教英文，內容包括寫公函同寫作步驟等，機會當前大家不要錯過喇！
某補習社最近喺社交網站，以「黃錢其濂太平紳士春風化雨」為題發貼，表示「寫作四部曲課程」、「紳士教你寫公函」、「作家教你作古仔」等課程尚餘小量名額，歡迎在職人士、大學生或大專生等報讀，唔少政界中人見到有關貼子都覺得黃太出山教英文，絕對係莘莘學子之福。
補習社重包裝，黃太喺○六及○七年曾經做過作家，出版過《虹城》同《花而山》兩本英文書。而黃太本身係太平紳士，所以補習社以「作家」同「紳士」嚟包裝佢，一啲都無誇張。