政情：商界急救中藥院

甚少同政府唱反調嘅工業總會，近日去信煲呔曾，對急急「殺院」表示不能理解，廠商會及九龍總商會都加入聲援行動。

工總喺信中話，政府欲成立新委員會接棒搞中藥，但該會仲未開始成立，卻急於停止賽馬會中藥研究院，當中產生嘅真空期，可能減慢香港中藥業研發進度。會方重申，香港有實際需要維持一所研發實體。講到咁白，訴求相當清晰。

劉文煒轟講一套做一套

廠商會都質疑新成立嘅委員會是否有充裕時間，承接中藥研究院的現存研究項目及檢測工作，擔心真空期會進一步窒礙業界步伐。會方近日正草擬信件，痛陳利害，坦言唔少業界會員需要就測試藥物等問題，急切尋求中藥研究院協助。

賽馬會中藥研究院主席劉文煒炮轟政府口講扶植中藥，卻講一套，做一套。對當局堅持「殺院」的決定，感到十分失望。對於政府話研究院「成效不彰」，佢話事實唔係咁，聲言有部分藥物仍在研究中，需要時間來等待「收成」。一旦「殺院」，香港中藥業便徹底失去科研後盾，難成大器。

劉坦言，研究院願意「換血」來爭取佳績；業界亦有誠意與政府共商未來發展，無奈政府一意孤行，漠視立法會一眾議員嘅反對聲音，令佢好痛心。劉又批評新成立的委員會，係「外行人管內行人」，成效成疑。業界群起反對，劉文煒話，若政府堅持「殺院」，不排除觸發業界上街抗議。

十年又十年，業界可以等幾多個十年？政府好需要商界支持，喺立法會都需要佢哋嘅票喇，今次商界聲音咁強烈，睇吓政府對商界嘅意見有幾重視囉。