中環出更：名人捐靚酒 賀專資會牛一
專業及資深行政人員協會早前五歲生日，逾四百會員開P慶祝。會長胡曉明（Herman）及創會會長容永祺（Samuel）齊齊割愛，分別捐出陳年靚茅台及法國名酒拍賣，為專資會進帳唔少。
胡曉明擊鼓助興
生日Party喺金鐘萬豪酒店舉行，Herman帶頭表演擊鼓助興。佢自爆事前只練習兩次就出台，幸好天分高，表現無失禮。Herman仲捐出一支一九八六年出廠嘅茅台，最終籌得三萬八千元。以市價計算，支酒至少值四萬幾，買家係副會長李鏡波，呢趟認真執到寶。
Samuel都唔執輸，捐出兩支一九七九年法國Lafite佳釀。一輪激烈競投後，由仁濟副主席嚴徐玉珊公子嚴子杰（Jacky）以八萬元投得。理大榮譽大學院士兼畫家麥羅武都捐出水墨畫作《迎喜》，成功籌得四萬八千元。
常務副會長謝偉銓當晚客串做埋「拍賣官」，理事楊素珊就滿場飛「請客」，佢九月尾喺北京開畫展，當然要Call老友撐場嘞。
卓妮