中環出更：新立會公眾入口 狹窄陰暗
添馬艦立法會新大樓啟用在即，卓妮前排遊覽過新大樓唔少地方，發現裏面唔少地方確係好寬敞好堂皇好現代化，不過公眾入口就細小同陰暗到不成比例，確係美中不足。
新大樓一共有四個入口，兩個位處添美道面向中信大廈，兩個對住維港，四個入口，議員專用同公眾用各有兩個。議員用嘅入口好宏偉，佢哋可以用長電梯直上會議廳，陽光透過玻璃牆射向電梯，不知幾開揚。可惜公眾入口完全係另一回事，面向維港嘅公眾入口最差，喺正鼓形嘅會議廳下面，公眾穿過自動玻璃門進入後只見到一大幅牆，牆下面有一個方形嘅入口，正如立法會行政管理委員會委員劉慧卿所言，成個山洞咁。總之呢個入口好陰暗，似後門多過似正門。
大樓已經起好咗，想改都無得改。由公眾入口離開大樓，就係啱啱對正新政府大樓所謂綠地氈斜坡嘅側面，呢度一啲都唔綠，恍如一堵灰色嘅護土牆。市民喺政府嘅心目中係乜，市民得到嘅對待就係最佳寫照。
議員不滿會議廳枱椅
大樓周圍都仲趕緊工，到處沙塵滾滾，議員已經分批搬入去，佢哋自不然有好多意見，例如會議廳枱面角位太尖、張枱太闊，但張椅只能前後移動而不能向左或向右移、議員辦公室唔准鑽窿掛畫等，相信議員相繼入伙後，會有更多意見同不滿。
有老友八畀卓妮知，老鼠喺新大樓已絕迹，但仲有烏蠅、蚊同蝨，希望煲呔曾下月中喺度讀施政報告時，公眾席上聆聽嘅唔包括蛇蟲鼠蟻喇。
卓妮