街燈被「加工」作商舖招牌多年，地政總署竟視而不見！張小姐發現，大埔寶鄉街有燈柱疑被改裝及加建成「毛冷市場」招牌，「本來都以為係普通招牌，但有一次差啲撞咗埋去，先發現佢擺到好低，望真啲原來係夾硬加喺街燈上面！」張又質疑街燈被「加工」多時，當局竟未有發現，「乜政府唔係會定期有人檢查街燈咩，點解個招牌擺咁耐都冇人理？」
地政總署發言人表示，接獲投訴後已派員到現場視察，發現燈柱旁邊放置一支鐵柱並懸掛招牌，已即時張貼通告，要求佔用人在指定日期前停止佔用，否則將移走該鐵柱及招牌。
不過，記者事後曾多次行經上址，發現該招牌仍然紋風未動。
「個招牌咁耐仲喺度，邊度有拆走？根本就冇心做嘢！」張小姐直斥地政總署未有處理招牌問題，無視行人的安全，「係咪要有人撞到或者跌落嚟傷到人先會做嘢？」