壹淫媒旗下免費報紙《爽報》，誨淫誨盜，意識不良，荼毒青少年，引來全城怒火，人人喊打！誠如「功夫茶」話齋：喺群情洶湧之下，影視處總算識驚，知道乜嘢叫做千夫所指，拿拿臨主動將鹹濕《爽報》送去淫審處評級。好喇！評級結果終於有喇——其中一日嘅情色小說同埋連續兩日嘅網上聲音版被暫定為第二類物品，即係不雅咁解。
淫賤黎處心積慮，無所不用其極，想把鹹濕《爽報》變成免費報一哥，於是狂印近百萬份，日日問人「你今日爽咗未？」最爽係拾荒阿婆同廢紙回收商。如此每日大造垃圾，做唔成免費報一哥，倒做咗環保最佳殺手。而十九才子可以話求仁得仁，贏得香江第一淫筆，睇佢三點盡露傾情演繹，廣東話普通話英文齊飛，加上有女聲配上呻吟，就差未有親自提槍上馬。淫賤黎與十九才子喺「全城伐爽」聲討下，就咁贏得兩個第一，果然如有神助，你話唔係奇迹都冇人信。宣淫販賤有運行，反正老朽就信了。
好喇！鹹濕《爽報》一出就被定為「不雅」，淫審處同影視處又會有乜跟進呢？根據以往壹淫媒觸犯《淫褻及不雅物品管制條例》而被定罪嘅個案，當局每次都係百擒百縱，咁搞法，對淫媒而言更加有宣傳作用：我淫故我在！
當局分明做唔到有法必依、執法必嚴，看來只能如前政務官譚榮邦喺《太陽報》嘅專欄所講：杯葛和罷看是唯一可能有效的途徑，用群眾力量迫使廣告商不在刊物上登廣告，斷其財路令其爽死了！