政情：各院爭重建 梁栢賢頭痕
聯合醫院一班員工近日趁醫管局行政總裁梁栢賢（PY，圖）參觀時，紛紛「攔路陳情」，希望管理層體恤病人插針都插唔入，盡速擴建，直頭當咗PY係黃大仙。
PY上星期同幾位醫管局董事局成員去聯合醫院參觀，該院出名地方淺窄，創院三十八年都無擴建，門診部日日逼滿病人。
據講PY一行人當日所到之處，都不斷聽到員工訴苦，皆因聯合去年中已向食物及衞生局提交擴建計劃，工程預算約七十億元，但當局一直無聲氣。PY當日出席員工論壇時，被多次問到究竟撐唔撐聯合擴建，佢無奈地回答，話要等政府拍板批錢先開得工。
除咗聯合醫院，作為港大醫學院教學醫院嘅瑪麗醫院，亦經常被一眾國手級教授批評設備殘舊，有百年歷史嘅廣華醫院更加已經「溶溶爛爛」，食衞局○八年已批准重建，前期規劃亦做好晒，原定今年動工，又係到依家都未有撥款。
間間醫院都爭先重建，PY嚟緊再去巡醫院，睇怕都會繼續被前線醫護近距離「發功」。