淫賤黎賣弄色情人盡皆知，今次推出免費嘅《爽報》再淪為過街老鼠。超過一百個團體聯署聲明，譴責《爽報》誨淫誨盜，要求學校同屋苑將呢一份「喪」嘅鹹報踢走！
影視處短短幾日已經收到一百一十幾宗投訴，不滿《爽報》渲染色情暴力荼毒青少年。影視處發言人就話嘞，已就投訴作出調查，並將懷疑違反《淫褻及不雅物品管制條例》嘅物品，送交淫審處評定類別。根據現行法例，任何人士未有根據條例規定發布不雅物品或向青少年發布不雅物品，若被裁定罪名成立，首次定罪最高刑罰為罰款四十萬元及監禁十二個月。
民間團體聲討《爽報》嘅聯署聲明提出五點要求：一，《爽報》刪除色情內容；二，各大屋苑拒絕派發；三，各位市民拒絕領取以示抗議；四，各大團體參與譴責行動；五，各大機構拒絕刊登廣告。宣淫販賤咪就係犯眾憎囉，《爽報》激到全人類嬲到震，齊聲向淫賤黎怒吼「色情不爽、拒絕淫報、救救孩子」。
之不過咁，功夫茶有一個疑問，向影視處投訴有冇用嘅呢？事關特區政府最鍾意包庇縱容壹淫媒，尤其係港英餘孽更加呵護備至。事實擺在眼前，壹淫媒曾經觸犯《淫褻及不雅物品管制條例》過百次，從來冇一次認真處罰，餐餐都係輕輕罰款一萬幾千了事，同法例規定嘅應得懲罰相差十萬八千里。如果唔係有沆瀣一氣嘅港英餘孽撐腰，有乜可能會容許一個長期積犯逍遙法外？
仲有呀，官老爺好鍾意玩差別待遇㗎。就好似○五年咁吖，《東方日報》及《太陽報》刊登一輯Kelly Brook沙灘性感照，打晒格仔，仍然被影視處送檢，淫審處評為二級不雅，但係《蘋果日報》刊登同一輯照片，只係評為一級非不雅，喺香港有得賣嘅外國雜誌《NOW》刊出一模一樣嘅照片，格仔都冇打，亦冇包膠袋，竟然連送檢都冇，更加唔使講評級。影視處嘅三重標準，根本就係選擇性針對東方報業集團，蓄意放生淫賤黎。
如果真係主持公道，應該學似台灣咁，出動打狗棒狠狠懲戒販賣色情嘅大淫蟲。台北市政府唔止一次重罰壹淫媒，市長大人甚至為家長仗義執言，譴責台灣《壹週刊》以及「動新聞」有傷風化教壞細路，不惜下令學校禁止訂閱爛果報。
計功夫茶話齋，鹹濕《爽報》固然犯眾憎，之但係如果官奸勾結繼續包庇淫媒，呢家嘢更加可恨。萬一真係不幸言中，功夫茶建議民間團體轉個頭去譴責喪官！