亞視新聞部早前爆出誤報江澤民死訊同涉嫌播放有償新聞風波，近日又輪到被指「是是但但」嘅無綫新聞部出事。有報咗名參選區議會人士向我哋投訴，話近日收到署名「無綫新聞部」發出電郵，叫佢哋喺七日內自行提供三十字政綱，否則即當放棄或拒絕該台報道，做法非常霸道。
最慘係有人接連收到三個同類電郵，但回覆地址個個都唔同，部分並非用無綫官網「tvb.com」，又冇留聯絡電話，個別電郵仲疑似帶有電腦病毒，令人擔心有人冒充無綫電視播毒，或藉此盜取佢哋嘅政綱資料，總之就搞到好麻煩。
我哋問過無綫新聞部中人了解事件，對方證實的確有發過有關電郵，但由於一啲內部問題，收件地址曾經改過並重新發放，近日唔少記者都收到相關查詢同投訴，已要求負責發電郵嘅同事搞番掂佢。不過，佢哋就冇聽過話電郵有毒，唔排除有人自己加咗料再轉發畀競選對手搞搞震喎。