政情：田二少玩唔起超級區會
思前想後，新民黨副主席田北辰終於決定披甲上陣，參加嚟緊區議會選舉。其實今年區選已經有唔少星級戰將參選，大部分都希望勝出為明年「超級區議會議席」取得入場券，但田二少就反其道而行，強調自己同新民黨都應該唔會派人出選，皆因佢哋難以取得足夠提名。
田二少尋日報名參選時話，今次參加區選原因係之前參加過電視節目《窮富翁大作戰》後，睇到好多微觀之處，感受到民生無小事，加上見微知著，將來研究宏觀問題亦可有所啟發，所以決定參選喎。田二少強調，新民黨絕對唔係空降，事關佢哋喺荃灣已經處理咗七百幾個個案，做咗唔少工作。
外界最關注係新民黨明年會否派人參加超級區議會選舉，田二少就笑笑口話，該黨只派十一人出戰區選，即使全部勝出，距離十五個區議員提名門檻仲爭幾個；睇嚟佢似乎想循新界西直選出戰居多喎！