政情：黃金寶葉少康獲頒城大院士
尋日可算係體壇嘅盛事，事關「亞洲車神」黃金寶同○八年殘奧馬術比賽代表葉少康，同獲城市大學頒授榮譽院士銜。阿寶喺媽媽、家姐及女友親身見證下接受榮譽，而佢母校沙田崇真學校嘅學弟妹都有到場祝賀，另外當然唔少得港協暨奧委會義務秘書長彭冲同體壇中人親臨撐場啦，場面相當墟冚。
今次係阿寶繼去年獲教院頒發榮譽院士後，再得到另一所本地大學認同，以表揚佢熱心回饋社會嘅功績，呢名單車隊老大哥話感到非常高興，覺得今次由大學頒銜嘅認受性高啲喎。正努力爭取明年公路賽奧運資格嘅阿寶坦言，一切會順其自然，雖然有諗過退役，但未來一、兩年仍會繼續踩落去。佢尋日行完禮後即趕到機場，準備今日喺印尼舉行嘅奧運資格賽。
獲城大頒授榮譽院士嘅仲有「深圳王」東海聯合（集團）主席黃楚標及渝振控股集團主席陳振東。陳振東代表幾位榮譽院士致詞時，大讚城大經過廿七年嘅成長，已經成熟健壯，並穩步向前發展。