政情：鄧忍光無車日露晒底
尋日係「國際無車日」，一班夕陽政府高官即使幾冇政治智慧都好，呢日都會改搭公共交通工具、環保電動車，住得近嘅甚至行路返工，總之整色整水扮晒支持環保。不過，政府班子一盤散沙，總係有啲官員唔合作兼倒米，尋日就有一位高官被傳媒無意中發現，冇跟劇本扮響應環保，照舊揸住自己部名車施施然上班去，呢個就係近期極為惹火嘅空降新任廣播處長鄧忍光喇！
夕陽政府咁多高官，除咗最大粒嗰幾個最受公眾關注外，應該冇人會留意其他官員搭乜嘢交通工具返工。但時也命也，尋日有傳媒晨早喺山頂白加道政務司司長官邸外，守候盛傳會辭職參選特首嘅唐英年坐電動車返工時，咁啱得咁蹺就畀人見到鄧忍光準備開車返港台，據講呢位是非纏身嘅廣播處長仲好詫異咁反問在場傳媒，點解會知佢喺度住喎。冇鏡就搵盆水照吓個樣，邊個得閒等你喎！
廣播處長呢個職位向來係燙手山芋，事關每次港台出問題，無論大事或小事，隨時都成為港府嘅政治炸彈，出任港台一哥嘅人除咗要有新聞觸覺外，最緊要係有政治敏感度，總之就要如履薄冰、步步為營啦。從尋日國際無車日事件睇到，鄧忍光根本就唔啱坐呢個位，先唔講佢工作同處事能力，淨係政治敏感度呢樣已經唔合格，連政治零蛋嘅煲呔曾都識得做戲行路去教堂禱告啦，鄧忍光竟然唔識，認真羞家。
環保戰將空談環保
如果大家記得，煲呔曾○九年喺施政報告提出慳電膽現金券計劃，呢件涉嫌益親家嘅醜聞遭各界狠批，據聞當日負責為煲呔曾推銷呢個計劃嘅就係時任環境局副秘書長鄧忍光，佢當時仲有環保戰將嘅美名添。再睇遠少少，鄧忍光由○五年開始就喺環保部門工作，先由環保署開始，再升到環境局，當時開口埋口講環保，支持呢樣嗰樣，但尋日無車日就如照妖鏡揭露佢只係空講環保。