中環出更：新立會大樓滿室藝術氣息
立法會申訴部今日搬到添馬艦嘅立法會綜合大樓，市民喺咁有藝術氣息嘅會議室度申訴，怨氣唔知會唔會略為消減呢？嚟申訴嘅市民，有機會喺四號會議室見到一幅叫做「百年香港」嘅巨型畫作，幅畫採用暖調，作者係曾獲多個藝術獎項嘅林東鵬。
其實新大樓地方大，所有藝術品都好巨型。例如市民一步入綜合大樓嘅公眾入口，就會喺長電梯見到一幅兩層樓高嘅藝術品，叫做「人物」，整幅作品係白色，只要結合燈光細心觀賞，就會睇到好多唔同嘅人，以及佢哋嘅剪影同倒影，作者係一位德籍香港藝術家。
舊大樓門框變畫框
新一年度嘅立法會就快開鑼，立法會秘書長吳文華（Pauline）每日要加緊巡場。對於立法會內嘅藝術品，Pauline梗係如數家珍。不過，有部分作品仍未掛起，佢引頸以待嘅其中一幅，係高齡八十二歲嘅顧媚畫嘅一幅國畫，呢幅畫會掛喺其中一個會議室、一打開門影壁嘅位置，幅畫又係大到要舉頭觀賞，Pauline特別將佢喺舊大樓辦公室嘅門框，複製為一個畫框將幅畫鑲裱。
複製自舊大樓嘅仲有舊會議廳嘅巨型吊燈，吊燈見證咗舊大樓好多歷史時刻，縮小版吊燈安裝咗喺新大樓一個細會議室，熟悉立法會嘅人，喺呢度彷彿見到老朋友。
卓妮