有少少常識都知道法庭內外唔可以影相錄影，但偏偏有區議會參選人犯呢個錯誤。話說尋日勞資審裁處有單案件，有意參選區議會嘅方國珊（哪吒）上庭作供，佢嘅對手民主黨張志董，同新民主同盟范國威都有旁聽，期間張志董想拍攝現場情況，點知當場斷正，畀法庭書記捉住，好彩法官睇過佢錄低嗰段片後覺得無乜特別，先至放佢一馬。
哪吒話估唔到張志董等人想借呢單官司挖佢嘅黑材料，而且仲要喺法官面前偷拍，最終畀法官當場嚴厲譴責。不過，張志董就有另一版本，話一去到庭已見到方國珊影緊佢，只係未開庭先冇人知道啫，反批哪吒係賊喊捉賊。張志董話，自己唔係想影任何人，只係攞部電話出嚟時，唔小心開咗個錄影功能，後來法官都有話佢不知者不罪，所以無懲罰佢。
最後兩人仍為攝錄事件死咬對方，各自報警處理，搞到上差館先至收科。唉，估唔到法庭會變成區選新戰場，唔通大家唔怕畀法官控告藐視法庭？