政情：李少光KO林D9 傳任CS
政務司司長（CS）唐英年預計會喺日內正式辭職宣布參選特首，並盛傳會由政制及內地事務局局長林瑞麟（林D9）接任司長，甚至有傳聞話現任特首辦主任譚志源將接替林D9掌政制局，現任食物及衞生局副局長梁卓偉則接任特首辦主任，講到真嘅一樣。不過，我哋聽聞有唐營中人好唔想林D9做CS，擔心佢會佗衰家進一步質低唐唐嘅民望，反建議由民望高企嘅保安局局長李少光接任，希望唐唐可以藉此叨光。
其實林D9之所以成為CS替補大熱，純粹因為其他疑似人選都各有缺點，例如財爺鬍鬚曾就因為炮製「史上最廢」預算案變咗過街老鼠、教育局局長孫明揚就年紀過高兼有病在身、之前嘅大熱人選發展局局長林鄭月娥就被指過於強硬得罪人多、另一表現唔錯嘅運輸及房屋局局長鄭汝樺就被指經驗較少同冇心更上一層樓，以致林D9有望執死雞。
有唐營中人指出，其實仲有一位現任問責官員有條件出任CS，佢就係李少光喇！須知保安局局長呢個位喺政治上相當敏感，李少光獲中央任命出任呢項要職，已經證明佢深得阿爺嘅信任。光哥喺能力同形象方面都唔輸蝕，即使警方近年被指濫權打壓人權自由，光哥亦鮮被牽連，長期成為民望最高嘅問責局長。
對於有指光哥喺入境處做專業職系出身，至今冇做過任何保安以外嘅工作，其實唐唐當年又何嘗唔係冇做過工商同財政以外嘅工作？最少光哥總算係公務員出身，唔似唐唐咁來自商界，加入政府初期完全唔熟悉政府程序。
人肉錄音機拒談傳聞
去咗江西南昌出席泛珠三角會議嘅林D9，尋日被問及升任司長傳聞時，繼續展示佢嘅「人肉錄音機」本色，話有關問題要問特首辦，下屆特首班子組成仲要等多幾個月先知，依家佢會專注做好政制局嘅工作，講咗等於冇講。不過，最少佢喺評論泛珠三角合作時完全唔使睇稿，亦絕少會講錯嘢，呢方面比唐唐做得好好多。