中環出更：傳接掌中總方文雄有隱憂
最近傳出中華總商會副主席、協成行董事總經理方文雄（David），有望明年接替黃宜弘做中總嘅立法會代表。
需分配時間搞生意
卓妮尋日喺一個活動上遇到David，佢對接棒一事不置可否，但承認中總有人游說佢參選。不過，David話參選要考慮有冇時間、如何處理家族生意，事關功能界別議員要加倍努力喎！
其實卓妮前日喺一個酒會問過中總會長蔡冠深，睇吓佢有否心儀立法會人選，但蔡會長冇直接表態支持邊個，僅強調中總人才濟濟，好多成員都具備參選條件，到時一定會有人出選喎，答得夠晒穩陣。如果David真係有心參選，睇嚟都要早啲做工夫爭取支持喇！
講番中總嘅最新動向，蔡會長透露過兩日會帶啲副會長同會董去山西考察幾日，了解吓西部大開發嘅發展情況，同時探索下投資落戶嘅可行性，為香港同山西兩地嘅經濟發展開發新機遇，而據聞中總亦會喺十二月搞個兩岸三地論壇，但具體嘅演講嘉賓名單仲有待決定。
卓妮