中環出更：工商專聯搞飯局又唔齊腳
八月下旬成立嘅工商專業聯盟係威係勢，喺立法會手握十二票令佢哋一舉成為立法會第一大政團，但聯盟中人有幾緊密合作就有待觀察，好似卓妮前日遇到佢哋食飯已經唔齊人。
卓妮前日見到聯盟召集人林健鋒（Jeffrey）、榮譽主席黃宜弘及田北俊等人到灣仔駱克道富東粵菜開餐，十二人之中，出席只有七至八個。
不過，話雖如此，聯盟不遲不早選擇喺特首選舉漸趨白熱化嘅時候舉行飯局，自然令人聯想佢哋坐埋密斟乜嘢大計。
不談特首選舉
Jeffrey同卓妮講，今次聚會唔會談及特首選舉問題，只會就民生議題交換吓意見喎，而黃宜弘被問及此事時亦統一口徑，笑笑口話只係食吓飯啫。
聯盟中人封口不談特首選舉，但提到自由黨同經濟動力能夠破鏡重圓，大家都自我感覺極為良好。不過，自由黨同經濟動力有幾同心協力，睇佢哋報名參選區議會選舉就略知一二。據聞聯盟之前事先張揚會有五十人參加區選，但區選提名期開始咗成個星期，聯盟至今仍未正式公布參選名單。究竟佢哋和好如初嘅蜜月期可以持續幾耐，大家就要拭目以待喇！
卓妮