政情：黃英琦籲區議員做好本分
區議會選舉舉行在即，喺區議會工作咗八年嘅前灣仔區議會主席黃英琦（Ada）就出咗本書，講番自己喺區議會工作咁多年嚟嘅心得。Ada話，區議會個個顧住搞「蛇齋餅糉」，似社工多過似區議員，但係喺社區發展同規劃度着墨唔多，希望打算參選區議會嘅人可以諗清楚自己嘅參選意念。
《營造灣仔——改革戰記》記錄咗Ada喺灣仔區議會嘅點點滴滴。Ada話依家個區議員顧住搞活動，好似啲街坊福利會嘅康樂組組長咁，仲「細心」到落雨收衫都要提醒班街坊。不過Ada就話，區議員唔係社工，應該多啲參與社區政策嘅工作，等啲街坊可參與社區發展至啱。Ada又話，其實要搞「蛇齋餅糉」，成本一啲都唔輕，早前就有一位區議員同佢訴苦，話向長者派糉後，點知長者就話，「嗰邊嘅議員派兩隻，仲係比較大嘅添，點解你隻糉咁細。」
Ada依家已轉戰文化教育界，但講番做區議員嘅日子，佢都有一番感受。