中秋佳節，花好月圓，八月十六，尋晚追月。中秋節雖然係家家戶戶慶團圓嘅良辰吉日，不過應節還應節，大家最好盡量避免三大危險動作。
第一項危險動作叫做煲蠟，呢家嘢睇怕唔使多講嘞，煲蠟一不小心就引火焚身，大人細路千祈唔好貪玩呀，樂極生悲就唔好啦。第二項危險動作係放孔明燈，冇錯，孔明燈慢慢飄上半空係非常之咁浪漫，可惜你無法控制落點，一旦造成山火就大劑嘞。至於第三項危險動作咯喎，就係應節指定動作食月餅。
嗱嗱嗱，咪話功夫茶嚇你，食月餅真係有機會骾死。早兩日之嘛，有兩位老人家不幸食月餅食到窒息，好彩及時送院急救咋，否則後果不堪設想。你知啦，月餅嘅主要材料係蓮蓉，一旦蓮蓉塞實喉嚨唔上唔落，咁就造成窒息。警察隻手卡住記者嘅攝錄機大不了妨礙新聞自由啫，月餅卡住喉嚨隨時攞命㗎！
食月餅固然危險，唔食月餅同樣危險，只不過受害嘅變咗地球咁解。中秋節之前喎，環保團體綠色力量訪問咗二百幾個家庭，發現每個家庭去年中秋節平均丟棄零點九一個月餅，數量較前年增加百分之十二。以此推算，香港去年總共丟棄咗二百二十一萬個月餅，數量足以填滿二十五個籃球場。
嘩，超過二百萬個月餅當垃圾丟棄，你都咪話唔得人驚，直情比唐英年嘅「垃圾論」更加可怕。「唐垃圾」嘅偉論大不了踐踏言論自由啫，咁多個月餅變成垃圾變相謀殺地球！
仲有呀，調查又發現，去年中秋節燒烤慶祝之後剩餘嘅肉類，較前年大幅上升，每個家庭平均剩餘十塊肉扒、十二條香腸以及十粒肉丸。當中有兩成家庭選擇丟棄剩餘物資，估計重量達到八十四公噸。
唉，香港人幾時變得咁冇衣食㗎？或者可以咁講，上有好者，下必甚焉，全香港最浪費資源嘅敗家仔非特區政府莫屬，既然官老爺都冇以身作則，小市民咪學壞手勢囉。
水務署年年因為滲漏而浪費兩成珍貴食水都唔講嘞，淨係睇番今年中秋花燈展吖，康文署居然喺維園同天后區用咗五千個鎢絲燈泡。前一排政府先至放風聲，話會逐步取締耗電量大嘅鎢絲燈泡，點不知康文署帶頭破壞環保，激死！
至於肩負環保神聖任務嘅環境局，最浪費嘅係養咗一大班尸位素餐嘅官僚。環境局對於改善空氣污染有乜嘢貢獻呀？對於改善海水污染有乜嘢貢獻呀？環境局都未做好環保工作，香港嘅環保教育咪搞到溶溶爛爛囉！