政情：譚文豪再戰東涌北
飛機師駕駛飛機要一眼關七，稍有差池就會累及全機人嘅安危，情況恰如特區之首，應該幫香港諗好方向，同時要應付突發情況。不過，諗住捲土重來參選離島區議會東涌北選區嘅三十六歲公民黨民航飛機師譚文豪（Jeremy）就話：「如果政府係一個飛機師，咁大家要跳機喇！」
入黨一年嘅Jeremy喺東涌北備戰多時，佢喺○七年參選過，當年該區有五人大混戰，佢以獨立人士身份攞到四百四十一票，輸畀現任區議員一百票左右，今年佢有意捲土重來，原來係飛機師性格作祟。佢話做機師必須顧及大環境，仲要擅於危機處理，可以話係同從政者嘅工作不謀而合。
講到夕陽政府嘅施政，Jeremy覺得勁唔對路，事關現屆政府做嘢全無方向，又唔識危機處理，好似派發六千元為例，突然間話派就派，完全唔識諗吓筆錢應該點用，難怪佢話如果政府係機師，市民真係要跳機自求多福。咁Jeremy又能否畀選民一個好嘅方向，以及能否處理好地區大小事務，咁就要拭目以待喇。