政情：范太收「e貓」叫封嘴
全國人大常委范徐麗泰連日來頻頻曝光，開口埋口提及早前發表「垃圾論」嘅政務司司長唐英年（唐唐），又話自己係對方嘅支持者。不過，范太尋日到香港仔郊野公園幫手清理中秋垃圾時，就一改近日逢唐必講嘅作風，佢話自己早兩日講唐唐只係諗住同市民交代吓，但之後冇再同對方傾過計，仲自爆收到好多電郵叫佢唔好再講選特首添！
范太之後又出席另一個活動，佢為咗成功封口講得更為決絕，表明自己要講嘅嘢已經講晒，再講已經係冇意義，再三重申倘若想做特首嘅人士，就要快啲去爭取市民支持，因為佢冇諗過支持自己嘅人可轉移支持其他人喎。唔講特首選舉，范太就講吓點過中秋節，佢話前晚冇食到團圓飯，只係食咗唔夠一個月餅，話食少啲嘢仲健康。
講番尋日朝早執垃圾，范太戴上勞工手套落手落腳執咗兩個煙頭同剷咗少少蠟，同場有市民請佢食雞翼，范太顯得心情大靚。