政情：李漢奸假民主辣興大舊
曾自稱要「日日做漢奸」嘅民主黨創黨主席李柱銘，沉寂咗一輪，尋日又蒲頭呼籲打算狙擊白鴿黨嘅人民力量，唔好喺星期四區議會選舉提名期一開始就去報名參選，先諗清楚，否則民主派互撼，最終只會讓建制派得益。曾經係白鴿黨員嘅人民力量立法會議員陳偉業（大舊）聽到李漢奸咁講，當堂大表失望，質疑李漢奸無非係驚白鴿黨會選輸啫！
李漢奸尋日話對於民主派喺區選互撼好唔開心，佢不點名叫人民力量「停一停、諗一諗」，因為狙擊嘅目標係想白鴿黨輸，並非爭取議席，咁嘅結果只會白白送咗個位畀保皇黨，所以佢希望人民力量諗清楚先去參選喎。
阿涂為區選開刀產子
其實任何合資格嘅香港市民都有參選權，呢個亦係白鴿黨反對替補機制嘅原因之一，難怪大舊咁㷫李漢奸咁講。大舊批評，李漢奸已經被個人情感蓋過民主理念，所謂嘅「民主之父」名義亦大打折扣，大舊仲反勸李漢奸「停一停、諗一諗」，事關去年白鴿黨討論政改時，都得唔到黨友重視。
另外，今年初為人父，又再戰區議會嘅立法會議員涂謹申透露，佢囝囝預產期咁啱係區選投票日，為免錯過呢個精彩時刻，佢同太太決定提早一個星期開刀產子，等囝囝成為萬聖節ＢＢ。