政情：唐營人馬出招吹捧泡沫
特首選舉疑似候選人唐英年同梁振英（CY）明爭暗鬥，其中早前發表「垃圾論」嘅唐唐民望插水下跌，一直潛水嘅唐營支持者為咗挽回劣勢，即時現身日夜唱好唐唐，其中盛傳係唐唐競選辦主任嘅胡定旭（肥胡），自爆只要有人搵佢做就會當仁不讓，疑似CY陣營中人嘅專資會創會主席容永祺（Samuel），亦突然嚇你一驚話支持唐唐。現時情況直情係皇帝唔急太監急，咁多人力撐一個仲未表態嘅疑似候選人，同撐一堆泡沫又有乜分別？
全國人大常委范徐麗泰係香港政商界揣摩北京心意嘅探熱針，最近范太一連多日開腔表明佢係唐唐支持者，暗示自己會棄選特首後，政界人士包括經濟動力議員林健鋒、廠商會會長黃友嘉、港區全國人大代表王英偉等，即時爭先恐後表態挺唐。
容永祺揀人問上帝
疑似唐營一係唔出招，一出招就人馬疊疊，好似尋日喺醫學界議員梁家騮嘅婚宴上，醫管局主席胡定旭首度大方承認挺唐，又話據佢了解，好多公務員都支持唐唐喎。當被問到係咪做唐唐競選辦主任時，肥胡首先耍太極話暫時冇人搵佢做，當再被追問，肥胡即時表態會當仁不讓，只係覺得自己何德何能會有人搵佢做，亦要睇下時間係咪許可喎。
同樣係支持緊一堆泡沫嘅Samuel話，自己上周末長時間祈禱，問上帝應該支持邊個疑似特首候選人，最後得到結論係支持唐唐，因為唐唐畀到佢有四個感動，包括凝聚力、親和力、易於溝通與聆聽意見喎。似乎神化咗啲喎。
一直鮮有談論政治嘅貿發局主席蘇澤光（Jack），亦罕有地喺出席公開場合時暗示自己係唐唐支持者。阿Jack解釋，唐梁都符合港澳辦主任王光亞提及愛國愛港、具市民認受性嘅兩個特首條件，但行政經驗都非常重要，似乎隱喻CY行政經驗不足，暗撐唐唐之聲呼之欲出。
但正所謂「政治一日都嫌長」，仲未辭職表態參選嘅唐唐能否成功入閘都係未知之數，各個挺唐嘅政界中人都係求神拜佛唐唐順風順水，否則泡沫爆破咗，真係喊到無謂喇！