中環出更：梁青華撐交通安全 獲嘉許

義務工作11年

話口未完，華哥日前喺柴灣青年廣場又錦上添花多咗一項榮譽，至今總共攞咗七個獎章。

今次華哥獲頒嘅，係民政事務局局長嘉許計劃獎項，以表揚制服團體嘅義務領袖。華哥話，本港好多交通意外，能夠加入交通安全隊向市民宣揚道路安全訊息，確係好有意義。

華哥喺交通安全隊服務咗十一年，職位係西九龍總區指揮官，職責係策劃區內嘅隊務發展，同埋帶隊維持秩序及宣傳道路安全。

華哥話為咗做義工，無可避免要縮減與家人共處嘅時光，連喜愛嘅高爾夫球運動都少玩咗。

不過，佢話有時見到啲小朋友勸止心急過馬路嘅家長，就覺得向青少年灌輸交通安全嘅工作並無白費心機，就算辛苦啲都係值得喎。