政情：袁彌明唔參選疑似結婚
坊間一直盛傳，選民力量靚女成員、前港姐袁彌明（Erica）會喺嚟緊區議會落中西區，挑戰民主黨立法會議員甘乃威。不過呢場大家翹首以待嘅夢幻對決肯定唔會實現喇，選民力量主席林雨陽尋日話，Erica嚟緊唔會落場參選，反而會轉任選民力量選舉統籌，幫其他成員助選咁話。
林雨陽強調，Erica呢個決定完全出於私人理由，至於理由係乜，佢就話唔方便講。不過尋日見Erica左手戴咗一隻疑似結婚戒指，追問佢嘅時候，Erica就露出甜絲絲笑容，盡在不言中。Erica唔選，原來民主黨新星李耀基都話唔會去狙擊工聯會陳婉嫻喇。
李耀基話，民主黨以往喺觀塘區主要服務公屋居民，但呢個區嚟緊會重建，興建好多私人樓，佢哋需要新血去開拓呢邊嘅服務，所以唔想貿然離開喎。民主黨主席何俊仁亦話，對於係唔係派人挑戰建制派大佬亦係未知之數，民主黨今年會派百三人出選，四十歲以下佔差唔多一半，唔通係銳意年輕化？