政情:靚女AO拍片瞓身挖新人

政府今個月請政務主任(AO),空缺有成廿五個。雖然唔少人覺得政府工係「筍工」,不過政府空降政務官出任廣播處長,搞到怨聲載道。政府可能驚嚇怕啲社會新鮮人,減低佢哋嘅投考意欲,尋日又再搵咗兩位靚仔靚女AO,拍短片親身講述政務主任工作有幾刺激好玩。不過段片嘅作用有幾大就唔知喇。

尋日政府新聞處播咗段片,由兩個AO簡介佢哋嘅工作。其中樣貌標致嘅發展局助理秘書長李麗筠就話,做AO唔使轉工都可以經常嘗試到新嘅工作,感覺刺激,又有滿足感,仲可以拓闊眼界咁話。

不過世上冇免費午餐嘅,好似兩個AO話齋,份工要有分析能力同責任感,留意時事之餘亦要有好好嘅語文能力。佢哋仲話,見工時係唔使背誦標準答案嘅。不過睇番依家啲高官司長,成日都畀人鬧英文唔好,又淨係識做「人肉錄音機」,似乎叫佢哋考番做AO,佢哋都未必考得到喎。

Money18免費即秒股票報價網站現推出8升級功能,財經資訊,實時實發!