功夫茶親眼目擊一幕驚心動魄嘅嚇人場面，有一位大叔喎，踩單車由青山公路一嘢轉入屯門公路。你知啦，屯門公路車來車往而且高速，單車大叔好容易車毀人亡㗎咋。
點解會有人喺屯門公路踩單車咁危險嘅呢？首先梗係膽生毛啦，香港有好多人唔知個死字點寫。其次，青山公路同屯門公路一帶冇單車徑，踩單車人士即使唔轉入屯門公路，都要被迫使用青山公路，危險程度不遑多讓。
車毀人亡唔係講笑㗎，呢嗱嗱嗱，沙田又有人踩單車被撞死嘞，一位沙田醫院女職員淪為專線小巴輪下亡魂。冇耐前之嘛，沙田大涌橋路又係小巴撞單車，中年男子同樣係一命嗚呼。
功夫茶唔敢肯定呢兩宗單車血案誰對誰錯，之不過鐵一般嘅事實就係，涉及單車嘅傷亡數字愈來愈多，今年頭八個月已經有十人死於單車事故，比起同期電單車五人死亡仲要多。至於大難不死嘅受傷數字，簡直多不勝數。
家陣真係好多人踩單車㗎，一來咯喎，明星效應，香港運動員近年屢獲殊榮，奧運又攞獎，亞運又攞獎，搞到不少雄心壯志嘅港男港女都想做單車英雄。二來咯喎，踩單車既環保又慳錢又健康，難怪一時成為風尚。
弊就弊在香港有一個懶到出汁嘅政府，基本上對於單車一族毫無保障可言。官老爺把口就識得講推動環保，可惜一有人要求打造單車徑啫，即刻耍手擰頭。香港單車同盟建議，由堅尼地城開始打造一條港島單車徑，沿住海濱貫通港島北岸，以杏花邨為終點，全長約十六公里，途中設立單車停泊位以及單車店舖等等。運輸署署長黎以德就話嘞，政府並不鼓勵市民喺市區使用單車作為交通工具，而且港島冇足夠道路空間興建單車徑。
黎署長言下之意就係話，你想踩單車唔該去新界。喂喂喂，即使去新界踩單車都唔係好過癮㗎咋，大家知唔知新界嘅單車徑好似斷橛禾蟲咁㗎？係呀，斷橛禾蟲，東一段，西一段，中間駁唔埋。就好似青山公路同屯門公路一帶咁吖，你想由元朗踩單車去深井食燒鵝咩，對唔住，係冇單車徑嘅，你夠膽咪學嗰一位大叔咁囉，一嘢轉入屯門公路，祝君好運！
撇開單車徑殘缺不全唔講，政府有冇提供單車教育呀？有冇提供安全指引呀？有冇諗過立法規定踩單車一定要戴頭盔呀？冇囉，搞到好多亡命單車手以為衝紅燈唔係犯法行為。
唉，踩單車死得人多，懶官僚睬你都傻，想做單車英雄確係要一眼關七呀，老友！