政情：傑青心郁郁想玩區選
呢個時候，相信各大政黨已準備好迎戰區議會選舉，但新民黨未出師就先易將，原本安排參選元朗天頌區嘅前消防處職工總會主席崔志強，因為彈弓手（手指屈肌腱鞘炎）、脊骨神經等舊患逐步浮現，最後決定改為擔任義工，取而代之嘅係該黨另一名成員黃卓健（Legward）上陣。
年僅廿八歲嘅Legward既係去年十大傑出青年，又一手創立長者家慈善基金，完全係香港精英。Legward話，佢原本有機會喺區議會選舉前數日修讀哈佛課程，全球只有二、三百人獲得取錄，但佢衡量後為咗情義同有心服務居民，決定積極考慮參選，希望日後可以提出建議改變下一代喎。
至於早前曾體驗窮人生活嘅新民黨副主席田北辰，亦正積極考慮喺荃灣愉景新城參選。據聞該黨內部擔心，一旦田二少喺區選落敗後，可能會對明年立會選舉有影響，所以最終田二少何去何從，大家拭目以待喇！