政情：湯恩佳拆大閘迎孔誕
近日名人同高官嘅僭建風暴此起彼落，就連孔教學院院長湯恩佳亦捲入僭建漩渦，其位於大浪灣道八號嘅豪宅被指霸官地僭建大閘。湯院長尋日同傳媒聚會時承認，其大閘所位處嘅地段屬於官地，但佢解釋該段路係通往其大宅嘅唯一通道，為免閒雜人等隨意進出，安裝大閘係好合理喎。
湯院長仲話，佢曾經同地政總署官員開會，覺得就算要打官司以保住大閘，佢贏面都會好高。不過，有鑑於政府處於弱勢，加上啲官員愈來愈冇膽，所以佢都好識做，決定將大閘拆卸，以免招致官商勾結嘅把柄喎。湯院長胸襟咁廣闊，又咁為得人，政府官員豈不是要多謝佢囉？
據講大閘拆卸工程將會盡快進行，事關本月廿四日係孔誕嘅大日子，為隆重其事，湯院長會邀請國內外一千二百位儒學學者，雲集灣仔新伊館齊齊慶祝兼舉行秋祭大典，而當晚仲會喺佢嘅大浪灣道豪宅舉行孔誕大成宴，預計有三百幾人出席，相當熱鬧。話時話，湯家大閘拆卸後，相信啲賓客進出都少咗層隔膜。