政情:范太心中有特首人選

之前話過唔選,後來又話會認真考慮嘅全國人大常委范徐麗泰,尋日再對參選下屆特首問題轉口風,一方面話自己會繼續考慮,但另一方面亦話如果佢心目中能夠接受嘅人宣布參選,佢自己就會唔選,而且會無條件支持呢位仁兄。佢又話心目中暫時得一位心水人選,但至於係男定係女,係咪政府中人,范太就唔肯再多講落去。

范太尋晚同自由黨青年團真情對話,參選特首議題自然係焦點。佢話現時會繼續聽人意見,但佢心目中現時有一位心水人選,如果嗰個人有實質行動,展示出參選嘅決定,佢就會放棄參選改為支持對方。不過支持還支持,范太強調自己唔會做嗰個人嘅助選團成員,亦唔會喺來屆政府擔當任何嘅角色。睇嚟特首戰已經去到最後階段,就嚟揭盅。

寸煲呔曾唔識「分餅」

范太又大談現屆政府嘅管治問題,疑似同煲呔曾埋單計數。佢話過去咁多年,政府喺經濟上只識整大個餅,但分餅仔分得唔夠好,出現有人食多咗,有人食少咗,下屆政府一定要分配均勻。對於八十後示威暴力,范太話衝擊政府嘅年輕人其實好少,但政府亦要反省自己有咩做得唔好,因為一個得人心嘅政府,冇人會去無故衝擊,就算有都唔會長久。

Money18免費即秒股票報價網站現推出8升級功能,財經資訊,實時實發!