政情：鬍鬚曾亂噏攞架嚟丟
面就人哋畀、架就自己丟，偏偏夕陽政府一眾高官就最鍾意丟架，就講煲呔曾個好兄弟財政司司長鬍鬚曾，年初搞咗份「史上最廢」財政預算案，結果民怨沸騰，認真低能。佢尋日篇網誌無喇喇屈九巴問人租電動巴士試行，九巴立即澄清件事唔係咁。事件再次證明，佢唔係低能又係乜嘢？
九巴其實一直有意引入電動巴士，鬍鬚曾尋日懶叻咁喺自己個網誌搶先「披露」，話內地公司比亞迪股份有限公司正同九巴商議，會將一部K9型單層巴士借畀九巴試行六個月，首先會行走尖沙咀至葵芳線。鬍鬚曾爆料，好似好威咁喎，不過實情當然唔係咁啦，九巴尋日急急澄清，狠摑鬍鬚曾一巴！
曾俊華喺網誌度話，比亞迪最近到香港科技園落戶，喺科技園內設立電動汽車研發中心，呢個係喺香港進行研發嘅起步點，並準備從深圳派專業研發人員來港，同香港科研機構接洽，共同研發。
佢又話，比亞迪正同九巴商議，打算出租一部K9型巴士予九巴試行半年，呢部巴士將行走尖沙咀至葵芳線。佢話，車上會安裝香港汽車零部件研究同發展中心、香港生產力促進局以及香港應用科技研究院嘅研發配件，包括車輛安全及乘客訊息服務系統、長身車輛無線倒車監視系統及輪胎壓力監測系統等。
試行路線都係亂講?!
講到似層層咁，以為鬍鬚曾真係咁叻知咁多嘢，點知話口未完，九巴發言人已經澄清，今次計劃係九巴「出資」與比亞迪「共同研發」右軚版電動車，部巴士將來的確會喺香港測試，但到港日期同行走路線仲係言之尚早囉。睇清楚啦，係共同研發，唔係「租車」呀！
九巴都算夠厚道喇，畀人老屈租車，都冇批評鬍鬚曾亂噏廿四，只不過身為夕陽政府高官，鬍鬚曾睇到呢項澄清之後唔知會有乜反應呢？所謂「獻醜不如藏拙」，好心鬍鬚曾就講少句啦，唔講人哋咪唔知佢係懵嘅囉。政府盤數喺佢手上，作為市民真係唔知信得佢邊句，如果佢真係諗住出糧出到明年六月卅日，好心就自我透明算喇。