內地黑心食品無奇不有，層出不窮，嗱，繼將人體屍油當食油之後，無良奸商最近又有新發明，就係「黑心滷味」喇！
香港人向來鍾意北上搵食，點菜前嚟一碟牛耳豬蹄滷水涼菜，更加係好多人嘅指定動作，不過功夫茶想提醒大家，小心禍從口入呀，說話可以亂講，嘢唔好亂食。點解？事關廣州最近又搗破黑心食品工場，揭發有人用有毒化學劑浸泡滷水食物，令賣相更佳，再以高價批發畀食肆謀利。
無良奸商創意無限，有時真係唔到你唔服，睇吓佢哋點樣炮製黑心滷味嘞。例如炮製牛耳朵，先用硫化鈉浸泡脫毛，再以硫酸銨令肉質變得光滑，最後就用雙氧水漂白。就係咁，本來發臭發黑嘅牛耳朵就變得又白又嫩又滑，係咪神奇過女士們嘅美白神仙水呢？
大家或者會問，喂，又硫化鈉，又硫酸銨，又雙氧水，乜東東嚟㗎？即係咁，基本上全部都係對人體有害嘅工業用化學劑，總之冇好嘢啦，唯一好處係雙氧水有強勁漂白功能，食你唔死或者可以幫你清腸胃嘅。
黑心無疆界，無良奸商為咗個錢字乜都敢做，黑心食品氾濫成災，其他偽劣產品更加係遍地開花。近日內地多個省市發現平價黑心棉床上用品賣到成行成市，河南省鄭州市就係其中一個重災區，某間大學校園附近嘅地攤同小型超市被全面攻佔，一張棉被六十蚊人民幣就有交易。嗱嗱嗱，大家咪諗住貪平執番兩張黑心棉被返香港呀，黑心棉通常來自病人同死人嘅廢舊物品，簡稱醫療廢物，接觸後隨時感染性病或其他病毒，博唔過㗎！
唉，無良奸商喪盡天良，殘害同胞，如果用佢哋嘅狼心狗肺炮製黑心滷味，味道如何唔敢講，但一定最毒！仲有包庇佢哋嘅貪官污吏，貪贓枉法，仲毒過黑心滷味！
話時話，河南人冚毒棉被，廣東人食毒滷味，根據呢條路線圖，容乜易好快輪到香港人受害㗎！你知啦，香港同廣東只係一河之隔，而港產官僚又出晒名渾渾噩噩，後知後覺，萬一被黑心滷味暗度陳倉攻入香港，市民咪好牙煙？以前唔係未試過嘅啦，蘇丹紅、孔雀石綠同三聚氰胺流入本港，港府有邊次係先知先覺吖。
係呢，被內地列為含鉻量超標嘅雲南毒菜，竟然符合港府食物安全標準公然輸港，第日一個唔好彩有毒滷味流入本地，港府會唔會又話冇問題㗎？嗱，食物及衞生局局長周一嶽，醒醒定定呀，你都唔想變成黑心滷味㗎！