政府呢頭先話會尊重傳媒，但煲呔曾似乎聽唔到，當記者透明。過去三日佢去咗新疆烏魯木齊出席亞歐博覽會，由抵埗到走人，全程都冇接受過傳媒訪問，相反新疆黨委書記張春賢就大大方方，接受香港傳媒訪問。
以往煲呔曾每逢外訪，多數會喺當地簡報行程，以及喺回程時作小小總結，多數記者會喺呢啲時候爭取提問。但今次煲呔曾去完新疆三日，未見過記者一次，完全係迴避傳媒。近排政府好多醜聞，包括黑影論、垃圾論，加上煲呔曾聲稱被撞傷一案，法官都判咗兩個涉案示威者無罪，唔知佢係咪唔識答或唔想答呢啲問題，所以避開記者呢？
不過，新疆黨委書記張春賢就唔同，唔止冇迴避記者，仲答咗好幾條關於疆獨喺香港嘅風險問題，作風開明。早排政府先講明會配合傳媒採訪，但依家煲呔曾見記者好似見鬼咁，講一套做一套咪就係呢啲囉。