政情：張灼祥談退休拒從政
拔萃男書院校長張灼祥做埋今個學年後，明年八月底正式退休。聽聞之前有人游說佢以獨立候選人身份出選區議會同立法會。不過，尋日張灼祥同傳媒聚會時就實牙實齒咁話：「百分百唔會從政！」又話政治唔係自己杯茶，亦唔會做官，反而想去文化中心搞棟篤笑，講下咁多年來喺教育界嘅趣聞，或者以人性為題材寫小說出書。
六十二歲嘅張灼祥加入教育界四十年，做咗廿八年校長，其中十二年校長生涯就奉獻咗畀男拔。佢話做每一件事總有個階段，今年新高中學制差不多上軌道、校內嘅IB教學大樓同音樂廳又就快起好，覺得自己嘅任務已經完成，係時候功成身退。佢斷言退休後一定唔會參政，「立法會議員可以發揮嘅嘢唔多，區議員更加唔使講，獨立候選人無黨派力量細，發揮唔到不如唔好做。」
問張灼祥點解唔加入政黨，佢話：「新民黨顧問都冇做啦，入咗政黨要一世忠於個黨，唔好做！」佢又話同啲高官唔熟，退休之後都唔會做官喎。